जमानौ बदळग्यौ, रंग-ढंग बदळग्या , भेस बदळग्यौ भासा बदळगी, मन बदळग्या , मानतावां बदळगी, सैंसकार बदळग्या धरम रौ सरूप बदळग्यौ अर बदळग्या मोल तोल करण री निजर रा आधार । पण आ सगळी उथळ-पुथळ घणखरी सैरां मैं ई हुई । गांव इणां सूं घणी बातां मैं अछूता रैयग्या ।
म्हारां गांवां मैं हाल ई जूनी बातां अर इसा भोळाभाळा मिनख मिळे है जिकां नै बदळियोडै जमानै री हवा ई का छीपी नी।
म्हांरौ लक्खू जाट इणी तरै रौ जीव हौ। किणी काम सूं माड़ाणी सैर रौ मूंडौ देखणौ पड़ियौ । अठै रौ ढंग-ढ़ाळौ अर जिनस-पत्तर नै आख्यां फाड़’र जोवै।
बां दिनां मैं फोनू बापरियां ई हां । सगळां नै, इयांरौ घणौ चाव हौ। जागा-जागा फोनू बाजै।
लक्खू देखियौ औ भळै क्या कोतक है ! बौ ई टुळक’र खनै जाय ऊभौ । लाई उचंबै भरीजग्यौ कै रावो क्या है ! पेटी मांय मिनख कियां बोलै है! इत्ती छोटी पेटी मैं बडियौ कांकर ! बड़ियौ तो मायौ कांकर ! मायौ तो जीवै कांकर !
हमैं क्या करै ! लाई रै गतागुम मैं का आयानी ! खनै ऊभै एक मिनख नै पूछियौ -औ भळै के सांगौ है ! भले भाई-भले !!
‘पेटी मै भूत बोलै है।’
‘साचो ई’
‘तो कूड़ थोडै ई?’
‘बड़ियौ कांकर !’
‘मिंतर सूं ।’
‘इण री पेटी रा के दाम लागै है ?’
‘सौ रुपिया’
‘समझ को पड़ी नी, कित्ता ?’
‘अरे जट्टू पांच बीसी, समझियौ’क? ‘
‘समझग्यौ। दाम बोळा लागै है। चीज तौ एड़ी है , भले भाई भले !
लक्खू आगै बधियौ । सैर मैं मसकरा मोकळा हुवै है। लक्खू नै देख’र एक जणै रै मन मैं चुळबुळी चाली ! बौलियौ – न चालियौ अर लक्खू री दाड़कळी झलतौ हुयौ ! पछै धमकांवता बोलियौ – ठैर । आगै किठै बधै है .!’
लक्खू चौकळौज’र कैयो – क्यूं ! तेरौ के लियौ !
‘आंटौ बोलै है, तनै ठा कोयनी !’
‘क्यां की ?’
औ घास क्यूं बाधायौ !’
‘म्हे गांववाळा दाड़ी रखावां हां ।’
रखावौ तौ हौ, पण इण रौ भार हुवै है नी ?’
‘मेरे पर, तो तन्नै के ?’
‘तेरे पर नही सड़क माथै । सिरकार इण पर लाग लगाय राखी है ।’
‘अरै भाई-अरे भाई -गांव ………’
‘गांव -फांव हूं को जाणू नी ? देखलै, तनै कोई दाड़ी वाळौ बैवतौ दीखै है ?’
लक्खू निजर पसार’र जोयौ तौ बैनै, निर मुच्छियां, अठै लावौ ! काजळ रै सिलकियै जियां, काजळ री बड़ी टिकी जियां, अर कोई-कोई बट घाल्योड़ी मूंछावाळा मिनख तौ बैंवता दीसिया पण दाड़ीवाळौ एक ई को दीसियोनी । जणै लक्खू रै जची कै बात तौ साची है ।
बौ लाई हाथ जोड़’र डरतौ बोलियौ -अबकाळे तौ छोड़दै पछै हूं मूंडा लेसूं । मैं तौ गांव रैऊं-हूं , ठा को हीनी ।
‘ठा को हीनी कैया छूटकौ को हुवैनी । राजकाज है , काढ़ रुपिया ?’
‘कित्ता’क ?’
‘दो बीसी।’
‘इत्ता मेरे खनै कठै पड़ियां है !’
‘जणै चाल कोटवाळी अर मूंडाव दाड़ी।’
‘अरे नही भाई। राम -दुहाई , मनै कोटवाळी मत लेजा !(डरते-डरते, आंसूं नाखतै ) मेरा हाड़ फोड़ गेरैगा !
आ दाड़ी तूंई भलां’ई कतरलै !!
सूणनियां सै हंसण लागा ! लक्खू रै पड़ी ही जीव री ! एक भलौ- माणस बोलियौ- क्यों संतावौ हौ रे, गरीब नै ? जावण क्यों दौनी ?
लक्खू रौ पिंडौ छूटियौ, अर बौ-तौ छू मिंतर हुयग्यौ
*मुरलीधर व्यास ‘राजस्थानी’*
आधुनिक राजस्थानी कहानी रा जनक ।
